छथर गाउँपालिकाद्वारा ६ प्रकारका निःशुल्क सेवा सार्वजनिक
तेह्रथुम, ५ असार — छथर गाउँपालिका, तेह्रथुमले नागरिकको सेवा र सुरक्षामा समर्पित हुँदै ६ प्रकारका निःशुल्क सेवा सञ्चालनमा ल्याएको छ। गाउँपालिकाले सार्वजनिक गरेको जानकारीअनुसार यी सेवाहरू जेष्ठ नागरिक, अपाङ्गता भएका व्यक्ति, महिलाहरू तथा पालिकाभित्रका सर्वसाधारणका लागि लक्षित गरिएका हुन्। गाउँपालिका अध्यक्ष सन्तोष तिगेलाले यस्ता सेवाहरूले जनताको जीवनस्तरमा सकारात्मक प्रभाव पार्ने विश्वास व्यक्त गर्नुभएको छ।
गाउँपालिकाले घोषणा गरेको ६ प्रकारका निःशुल्क सेवा निम्नानुसार छन्:
१. जेष्ठ नागरिकको वार्षिक उपचार सेवा
प्रत्येक वर्ष एकपटक गाउँपालिकाभित्रका जेष्ठ नागरिकहरूले निःशुल्क स्वास्थ्य उपचार सेवा पाउने छन्।
२. मलामी खाजा खर्चस्वरूप पाँच हजार रुपैयाँ सेवा
गाउँमा कसैको निधन भएमा मलामीमा सहभागीजनका लागि खाजा खर्चस्वरूप नगद रु ५,००० उपलब्ध गराइनेछ।
३. शव ओसारपसारका लागि ट्याक्टर सेवा
गाह्रो परिस्थितिमा मृतकको शव ओसार्न गाउँपालिकाले निःशुल्क ट्याक्टर सेवा उपलब्ध गराउनेछ।
४. विवाह, व्रतबन्ध तथा सामाजिक कार्यहरूमा खानेपानी पुर्याउने ट्याक्टर सेवा
गाउँमा हुने सामाजिक तथा धार्मिक कार्यक्रमहरू—जस्तै विवाह, व्रतबन्ध आदिमा ट्याक्टर प्रयोग गरी निःशुल्क खानेपानी सेवा प्रदान गरिनेछ।
५. एम्बुलेन्स सेवा
जेष्ठ नागरिक, पूर्ण अपाङ्गता भएका व्यक्ति, सुकुम्बासी महिला तथा गर्भवती महिलाहरूका लागि पालिकाभित्र आपतकालीन अवस्थामा निःशुल्क एम्बुलेन्स सेवा उपलब्ध गराइनेछ।
६. असहाय तथा संरक्षणविहीन बालबालिकाका लागि अभिभावकत्व तथा सशक्तिकरण कार्यक्रम
गाउँपालिकाले असहाय, अनाथ, अपाङ्ग र संरक्षणविहीन बालबालिकाहरूलाई लक्षित गरी अभिभावकत्व ग्रहण, पालनपोषण तथा सशक्तिकरणसम्बन्धी कार्यक्रम सञ्चालन गर्नेछ।
गाउँपालिकाका अध्यक्षको नेतृत्वमा सञ्चालित यस सेवा कार्यक्रमले ग्रामीण क्षेत्रका नागरिकहरूलाई राहत र सम्मान दिन मद्दत गर्ने अपेक्षा गरिएको छ
